L'occhi
Ucchiuzzi nìuri
si taliati,
faciti càdiri
casi e citati;
jeu, muru debuli
di petri e taju,
cunsidiratilu
si allura caju!
Sia arti maggica,
sia naturali,
in vui risplendinu
biddizzi tali,
chi tutti ‘nzèmmula
cumponnu un ciarmu
capaci a smoviri
lu stissu marmu.
À tanta grazia
ssa vavaredda,
quannu si situa
menza a vanedda,
chi, veru martiri
di lu disiu,
cadi in deliquiu
lu cori miu!
Si siti languidi,
ucchiuzzi cari,
cui ci pò reggiri?
cui ci pò stari?
Mi veni un pìulu,
chi m’assutterra,
l’alma si spiccica,
lu senziu sferra.
Poi cui pò esprimiri
lu vostru risu,
ucchiuzzi amabili,
s’è un paradisu?
Lu pettu s’aggita,
lu sangu vugghi,
sù tuttu spìnguli,
sù tuttu agugghi.
Ma quantu lagrimi.
ucchiuzzi amati,
ma quantu spasimi
chi mi custati!
Ajàti làstima
di lu miu statu:
vaja, riditimi,
ca sù sanatu!
(Giovanni Meli)
Foto di Leo Sinzi
Nessun commento:
Posta un commento